O‘ZBEKISTON O‘QITUVCHI VA MURABBIYLARIGA
28.09.2012

Qadrli ustoz va murabbiylar!

Muhtaram yurtdoshlar!

Bugun, mana shu qutlug‘ ayyomda barchamiz uchun eng aziz, eng qadrli bo‘lgan farzandlarimizga bilim va tarbiya berishdek ulug‘ ishga butun borlig‘ini bag‘ishlagan siz, hurmatli o‘qituvchi va murabbiylarni chin qalbimdan tabriklab, ezgu tilaklarimni bildirishdan baxtiyorman.

Aziz do‘stlar!

Haqiqatan ham, dunyodagi ming-minglab kasblar orasida ikkita buyuk kasb – shifokorlik va o‘qituvchilik kasbi borki, ular, toki hayot bor ekan, o‘zining ma’no-mazmuni va olijanobligini, ahamiyati va hurmatini hech qachon yo‘qotmaydi.

Bugun biz O‘qituvchi va murabbiylar kuni deb nom olgan go‘zal bayramimizni nishonlar ekanmiz, o‘zining iste’dodi va mahoratini, ko‘z nuri va qalb qo‘rini baxsh etib, yosh avlodimizga bilim, ilmu fan sirlari va odamiylik saboqlarini o‘rgatadigan sizdek mo‘tabar zotlarga har qancha tahsin va tasannolar aytsak, arziydi, albatta.

Shu bois bugun sizlarning qo‘lingizda ta’lim va tarbiya, hayotga yo‘llanma olgan, o‘zini sizlarning oldingizda umrbod qarzdor deb his etadigan barcha insonlar nomidan, o‘quv maskanlarida ta’lim olayotgan millionlab o‘quvchilar nomidan “Rahmat sizga, muallim, ta’zim sizga, ustozlar!” deb minnatdorlik bildirishimiz har tomonlama o‘rinlidir.

O‘zbekistonimizning taraqqiyoti yo‘lida, biz o‘z oldimizga maqsad qilib qo‘ygan rivojlangan demokratik davlatlar qatoriga ko‘tarilishdek ulug‘vor vazifani amalga oshirishda siz azizlarning qo‘shayotgan beqiyos hissangizni baholash uchun yana bir fikrga alohida to‘xtalish zarur, deb bilaman.

Hech kimga sir emas, bugungi kunda faqat yuksak bilimli, zamonaviy, mustaqil fikrlaydigan, intellektual rivojlangan va amaliy kasb-hunarlarga ega bo‘lgan yoshlargina mamlakatning buyuk kelajagini ta’minlashi mumkin.

Ana shunday o‘ta og‘ir va o‘ta dolzarb, istiqbolimizni hal qiladigan maqsadga erishish uchun ta’lim sohasida chuqur va puxta o‘ylangan milliy dasturlarimizni tayyorlash va amalga oshirishda bizning oxirgi 15-yil davomida qilgan ishlarimizni butun dunyo tan olmoqda.

Buning yaqqol tasdig‘ini shu yil fevral oyida Toshkent shahrida “Yuksak bilimli va intellektual rivojlangan avlodni tarbiyalash – mamlakatni barqaror taraqqiy ettirish va modernizatsiya qilishning eng muhim sharti” mavzusida bo‘lib o‘tgan xalqaro konferensiya misolida ko‘rish mumkin. Ana shu anjumanda BMT va boshqa nufuzli xalqaro tashkilotlarning vakillari, dunyodagi eng dong‘i chiqqan universitetlarning olim va professorlari tomonidan O‘zbekistonning bu sohada erishgan yutuqlari, mamlakatimizning ta’lim modeli yuksak e’tirof etilgani Vatanimizning jahondagi obro‘-e’tiborini yangi bosqichga ko‘tarishga katta xizmat qildi, desak, hech qanday xato bo‘lmaydi.

Yoshlarimizning ongu tafakkurini, butun hayotini tubdan o‘zgartirib borayotgan, ilg‘or xorijiy tajribalarni, milliy va umuminsoniy qadriyatlarni o‘zida mujassam etgan bunday dasturlarni amalga oshirish avvalo siz azizlarning og‘ir va murakkab mehnatingiz evaziga bo‘layotganini hech kim hech qachon inkor etolmaydi. Va sizlarning bu ezgu maqsadga erishish yo‘lidagi olijanob xizmatlaringizni, yurtimizda erkin, obod va farovon hayot qurish borasida ko‘rsatayotgan fidoyiligingizni jamiyatimiz, xalqimiz doimo yuksak qadrlaydi.

Shu ma’noda, 1-oktabr sanasini bundan 16-yil oldin mamlakatimizda O‘qituvchi va murabbiylar kuni – umumxalq bayrami deb e’lon qilganimiz siz, azizlarga, sizlarning mashaqqatli, shu bilan birga, sharafli mehnatingizga el-yurtimiz, shaxsan o‘zimning yuksak hurmat va ehtiromimning yaqqol ifodasi, desam, har tomonlama to‘g‘ri bo‘ladi.

O‘zbekistonning ta’lim sohasiga qaratayotgan ulkan e’tiborini tasavvur qilish uchun quyidagi ba’zi bir raqamlarni keltirish o‘rinli, deb o‘ylayman.

Mamlakatimizda har yili davlat byudjeti xarajatlar qismining 35 foizdan ziyodi ta’lim sohasiga yo‘naltirilmoqda. Keyingi o‘n yilda o‘qituvchi va murabbiylarning maoshi iqtisodiyotimizning real sohasidagi ish haqi miqdoridan o‘rtacha 1,5 barobar ko‘p o‘sgani, pedagog xodimlar mehnatini baholash va rag‘batlantirishning zamonaviy tizimi joriy etilganini alohida qayd etish lozim.

Shu o‘rinda yana bir misolga e’tiboringizni jalb etmoqchiman.

O‘zbekistonda ta’lim sohasini rivojlantirish va isloh etishga yo‘naltirilayotgan yillik xarajatlar yalpi ichki mahsulotning 10-12 foizini tashkil etmoqda. Vaholanki, dunyodagi ko‘plab mamlakatlarda bu ko‘rsatkich 2-5 foizdan oshmaydi.

Keyingi yillarda mamlakatimizda 9763 ta umumta’lim maktabi, 300 dan ziyod musiqa va san’at maktabi, 143 ta akademik litsey, 1406 ta kasb-hunar kolleji, 59 ta oliy o‘quv yurtida katta hajmdagi qurilish va rekonstruksiya ishlari olib borilgani, ularning moddiy-texnik va o‘quv-metodik bazasi mustahkamlanib borayotgani ta’lim tizimida biz amalga oshirayotgan islohotlarning miqyosi va ko‘lami naqadar ulkan ekanidan dalolat beradi.

Qadrli vatandoshlar!

Bugun dunyoda, yon-atrofimizda ro‘y berayotgan notinchlik, qarama-qarshilik va ziddiyatlar, hech shubhasiz, hammamizni o‘ylantirishi tabiiy.

Men siz, hurmatli o‘qituvchi va murabbiylarni bu muammolarning barchasini qalbidan, yuragidan o‘tkazib, ulardan to‘g‘ri xulosa chiqarib yashaydigan insonlar sifatida bilaman.

Ayrim qabih kuchlar tomonidan o‘zining strategik maqsadlarini ko‘zlab, yovuz niyat bilan amalga oshirilayotgan bunday g‘arazli ishlardan xalqimizni, ayniqsa yoshlarimizni ogoh etish, millat va elatlarni bir-biriga qarama-qarshi qo‘yishga urinishlarning haqiqiy ma’nosini, ularning qanday og‘ir oqibatlarga olib kelishi mumkinligini ochib berishda, odamlarni hushyor va sezgir bo‘lib yashashga, musaffo osmonimizni, tinch hayotimizni ko‘z qorachig‘idek asrash va qadrlashga da’vat etishda men birinchi navbatda sizlarga ishonaman va bundan buyon ham barchangizni o‘zimning maslakdoshim, deb bilaman.

Men davlat rahbari sifatida siz jonkuyar muallim, murabbiy va domlalarning, barcha ma’rifat ahlining o‘z tanlagan kasbingizdan rozi va mamnun bo‘lib yashashingiz uchun, Vatan oldida, kelajak oldida qilayotgan ulug‘ xizmatlaringizni munosib taqdirlash, hayotimizda yuksak obro‘-e’tibor topishingiz uchun ham qonuniy, ham moddiy, ham amaliy zamin tug‘dirib berishni o‘zimning nafaqat vazifam, balki sharafli burchim, deb hisoblayman.

Aziz va muhtaram ustozlar!

Sizlarni O‘qituvchi va murabbiylar kuni – umumxalq bayrami bilan yana bir bor samimiy tabriklab, barchangizga sihat-salomatlik, baxtu saodat, xonadonlaringizga tinchlik-xotirjamlik tilayman.

Umringizdan baraka toping, hech qachon kam bo‘lmang, qadrli ustozlar!

Islom Karimov,
O‘zbekiston Respublikasi Prezidenti

                o`zb   рус   eng
Bugun: 23.01.2020
Qidirish
© 2008 - 2020 O`zbekiston Respublikasi Prezidentining matbuot xizmati