Prezident Islom Karimov Turkmaniston Prezidenti bilan uchrashdi
23.06.2016

O‘zbekiston Respublikasi Prezidenti Islom Karimov 23-iyun kuni Ko‘ksaroyda Shanxay hamkorlik tashkiloti sammitida ishtirok etish uchun mamlakatimizga tashrif buyurgan Turkmaniston Prezidenti Gurbanguli Berdimuhamedov bilan uchrashuv o‘tkazdi.

2306201615.jpg

Islom Karimov Turkmaniston Prezidenti bilan suhbatda uning Shanxay hamkorlik tashkiloti Davlat rahbarlari kengashi majlisida faxriy mehmon sifatida ishtirok etishi mamlakatlarimiz o‘rtasidagi o‘zaro ishonch va yaxshi qo‘shnichilikka asoslangan hamkorlikning yana bir ifodasi ekanini qayd etdi. Bu davlatlarimiz mintaqada va xalqaro miqyosda bir-birining nufuzini oshirish hamda pozitsiyasini mustahkamlashni qo‘llab-quvvatlab kelayotganini namoyon etishini ta’kidladi.

O‘zbekiston – Turkmaniston munosabatlari yuqori sur’atlar bilan rivojlanib bormoqda. Oliy darajadagi muloqotlar muntazamlik kasb etgan.

2015-yilda o‘zaro tovar ayirboshlash hajmi 320 million AQSh dollarini tashkil etdi. Mamlakatimizdan Turkmanistonga avtomobillar, qishloq xo‘jaligi texnikasi, mineral o‘g‘itlar, oziq-ovqat mahsulotlari va boshqa tovarlar eksport qilinmoqda. Turkmanistondan yurtimizga neft va neft mahsulotlari yetkazib berilmoqda.

Transport va tranzit sohasi iqtisodiy aloqalarning strategik yo‘nalishlaridan. O‘tgan yili O‘zbekiston tashqi savdo yuklarini Turkmaniston orqali tashish hajmi 43 foiz o‘sgani buning yaqqol dalilidir.

Uchrashuvda o‘zaro savdo-iqtisodiy, madaniy-gumanitar hamkorlikni kengaytirish masalalari muhokama qilindi. Tomonlarni qiziqtirgan mintaqaviy va xalqaro ahamiyatga molik muammolar yuzasidan fikr almashildi.

Turkmaniston Prezidenti Gurbanguli Berdimuhamedov ShHT sammitiga taklifi uchun Prezidentimiz Islom Karimovga samimiy minnatdorlik izhor etdi. Turkmaniston O‘zbekiston bilan ko‘p qirrali hamkorlikni yanada rivojlantirishdan manfaatdor ekanini bildirdi.


                o`zb   рус   eng
Bugun: 24.09.2019
Qidirish
© 2008 - 2019 O`zbekiston Respublikasi Prezidentining matbuot xizmati