Tashrif samarali bo‘ldi
18.11.2015

Mamlakatimizga rasmiy tashrif bilan kelgan Pokiston Islom Respublikasi Bosh vaziri Muhammad Navoz Sharif 18-noyabr kuni poytaxtimizdagi Mustaqillik maydoniga tashrif buyurdi.

Oliy martabali mehmon hurriyatimiz, porloq istiqbolimiz va ezgu niyatlarimiz ramzi bo‘lgan Mustaqillik va ezgulik monumenti poyiga gul qo‘ydi.

Muhammad Navoz Sharif ushbu muazzam maydonda Prezidentimiz Islom Karimov rahnamoligida amalga oshirilgan ulkan bunyodkorlik va obodonlashtirish ishlariga yuksak baho berdi.

Pokiston Islom Respublikasi Bosh vaziri Muhammad Navoz Sharif O‘zbekiston Respublikasi Bosh vaziri Shavkat Mirziyoyev hamrohligida Samarqandga tashrif buyurdi.

Oliy martabali mehmon Imom Buxoriy majmuasini ziyorat qildi. Pokiston Bosh vaziriga buyuk muhaddis Imom Buxoriyning boy ma’naviy merosi, muqaddas dinimiz rivojiga qo‘shgan beqiyos hissasi, mustaqillik yillarida Prezidentimiz Islom Karimov rahnamoligida bu yerda amalga oshirilgan ulkan bunyodkorlik va obodonlashtirish ishlari haqida so‘zlab berildi.

Mirzo Ulug‘bek rasadxonasi va muzeyi bilan tanishuv chog‘ida oliy martabali mehmonga Mirzo Ulug‘bekning jahon ilm-fani rivojiga qo‘shgan ulkan hissasi, alloma yaratgan ilmiy maktab haqida atroflicha ma’lumot berildi. Muzeydagi noyob eksponat va tarixiy ashyolar ajdodlarimizning buyuk zakosi, yurtimiz ilm-fanining chuqur ildizlari va taraqqiyotidan dalolat berishi alohida ta’kidlandi.

Amir Temur maqbarasi va Registon majmuasi pokistonlik mehmonlarda katta taassurot qoldirdi. Ular bu yerdagi milliy hunarmandlik buyumlari ko‘rgazmasi, qo‘li gul ustalarimiz tayyorlagan mahsulotlarni qiziqish bilan tomosha qildilar.

Muhammad Navoz Sharif qadim madaniyatimiz va milliy davlatchiligimiz timsoli, me’morlik san’atining yuksak namunasi bo‘lgan Samarqand obidalari unutilmas taassurot qoldirganini alohida ta’kidladi.

Pokiston delegatsiyasi a’zolari mamlakatimizda ishlab chiqarilayotgan yuk avtomobillari va avtobuslar, qishloq xo‘jalik texnikalari ko‘rgazmasini ham ko‘zdan kechirdi. Samarqanddagi “JV MAN Auto Uzbekistan”, “SamAvto” korxonalarida ishlab chiqarilayotgan “MAN” va “Isuzu” rusumli yuk mashinalari, avtobuslar va boshqa transport vositalari mehmonlarda katta qiziqish uyg‘otdi.

– Bu texnikalar O‘zbekistonda sanoat, mashinasozlik jadal rivojlanib borayotganidan dalolat beradi, – dedi Muhammad Navoz Sharif. – Nufuzli kompaniyalar bilan hamkorlikda tayyorlanayotgan yuk mashinalari, zamonaviy qishloq xo‘jalik texnikalarining imkoniyatlari yuqori. Bu O‘zbekiston bilan mazkur yo‘nalishda ham samarali hamkorlik qilish istiqbollarini ko‘rsatib turibdi.

Shu bilan Pokiston Islom Respublikasi Bosh vaziri Muhammad Navoz Sharifning mamlakatimizga rasmiy tashrifi yakuniga yetdi.


                o`zb   рус   eng
Bugun: 20.10.2019
Qidirish
© 2008 - 2019 O`zbekiston Respublikasi Prezidentining matbuot xizmati